CEBU, Philippines — Laing unom ka armas ang nabawi sa Waterfront Police Station gikan sa mga gipangbilinan sa gipasanginlan nga polis nga nikawat niini.
Kini ang gikompirmar ni WPS chief, Police Major Jomar Pomarejos, human gitudlo sa gisugo ni Police Corporal Marlito Portugueza nga gibinlan sa armas.
Gibutyag ni Pomarejos nga nagkaila ang ikaduha nga saksi ug si Portugeza sa dihang gidakop kini sa kasong frustrated homicide ug ang maong polis maoy imbestigador sa kaso kinsa maoy gisaligan nga maoy mohipos sa mga armas.
Niadtong Disyembre pa unang nahitabo ang pagpangawat gikan sa evidence room.
Atol sa follow up operation sa pagpangita sa mga armas nakuha ra sab kini gahapon sa buntag.
Sa 12 ka armas nga nawala, usa lang niini ang nabaligya ug nabayran na og P15,000.
Kagahapon pormal na nga gisang-at sa WPS ang kasong robbery batok kang Portugueza ug posible nga magsunod na sab ang lain pang kaso niini sama sa administratiba. /GMR (BANATNEWS)