CEBU, Philippines – Gipangita na karon sa Bureau of Quarantine ang 26 ka Koreans gikan sa Daegu City sa North Gyeongsang Province, South Korea nga niabot sa Sugbo sa niaging gabii isip mga turista.
Matud ni Dr. Jaime Bernadas, regional director sa Department of Health 7, nga ang maong mga Koreans gikonsiderar karon nga Persons Under Monitoring (PUM) tungod kay gikan man sila sa lugar nga adunay kaso sa coronavirus disease-19.
Si Bernadas nagkanayon nga kun adunay mopakita og sintomas sa CoVid-19 sa maong mga langyaw makonsiderar na sila nga Persons Under Investigation (PUI) ug iadmit sa tambalanan. Kun makit-an na ang maong mga Koreans anha sila sa ilang gipuy-an nga hotel ug dili makagawas sa ilang mga lawak samtang ipaubos sa monitoring gawas lang kung modesisyon ang Korean Embassy nga papaulion sila.
Gikompirmar sa hepe sa Bureau of Quarantine, Dr. Terrence Bermejo, nga adunay 26 ka Koreans sakay sa usa ka flight gikan sa Daegu City ang niabot sa Sugbo niadtong Martes sa gabii sa wala pa gipatuman ang temporary travel ban sa Pilipinas sa mga langyaw nga gikan sa South Korea.
Samtang gibati og kabalaka ang mga tourist guide sa Dakbayan sa Lapu-Lapu sa epekto sa ilang panginabuhi sa pag-ban sa biyahe gikan sa South Korea.
Si Eugene Inot, 37, tourist guide nga taga Maribago sa maong dakbayan, nga ang iyang mga kustomer mao ang mga Chinese samtang mga Japanese ug Koreans sab ang iyang kaubanan.
Matud ni Inot nga sukad sa pagtumaw sa hulga sa CoViD-19, nagkanihit ang mga langyaw nga Chinese hinungdan nga nagbahin na sila ug iyang mga kauban sa mga Koreans nga turista.
Si Mayor Junard “Ahong” Chan sa Dakbayan sa Lapu-Lapu nakapanglantaw sab sa maong kahimtang karon nga gi-ban ang biyahe gikan sa South Korea.
Nasayran nga sa nasud maoy nag-una ang mga Chinese nga mobisita ug ikaduha ang mga Koreans samtang nagsunod ang gikan sa Amerika ug Japan.
Samtang pipila na ka kompaniya sa nagkalaing-laing industriya sa Sugbo ang nipadala og suwat hangyo sa Department of Labor and Employment 7 labot sa tinguhanga magpatuman og flexible work hours tungod sa hulga sa CoViD-19.
Matud sa tigpamaba sa DOLE-7, Luchel Taniza, nga naobserbahan sa mga nanag-iya sa kompaniya ang pagminus sa ilang mga kliyente diin kasagaran mga langyaw.
Mga apektado mao ang furniture company, meat processing company ug restaurant nga nakabase sa Lapu-Lapu, Mandaue ug Cebu City.
Giklaro hinoon ni Taniza nga bisan og adunay kausaban sa oras sa trabaho dili apektado ang mga regular nga empleyado sa ilang sweldo.
Apektado sa maong flexible work hours ang mga nagdawatan og inadlaw nga sweldo. Gitug-n ni Taniza nga kung adunay mawagtangan og panginabuhian andam ang DOLE-7 sa pagtabang pinaagi sa Emergency Employment Program diin maghimo sila og profiling aron ilang masayran kung unsa nga klase nga ayuda ang ilang ihatag sa mga apektadong mamumuo. Romeo T. Limpangog ug Rowena D. Capistrano/GMR (BANAT NEWS)