CEBU, Philippines — Nunot sa hulga sa 2019-Novel Corona Virus, ang parokya sa Archdiocesan Shrine of San Roque sa Mambaling, Dakbayan sa Sugbo mopahigayon og prosesyon karong gabii.
Matud sa kura paruko, Fr. Carmelo “Melo” Diola, nga dungan kini sa pagbisita sa imahen sa Balaang Bata nga si Señor Sto. Niño ug Jubilee Cross isip kabahin sa 500 ka parokya nga suroyon may kalabutan sa ika-500 ka tuig sa Kristiyanismo sa 2021.
Matud ni Diola nga sa dili pa ang prosesyon adunay symposium mahitungod sa Jubilee Cross ug may labot sa nCoV gikan sa alas 4:30 sa hapon ug sundan sa Santos nga Misa sa alas 6 sa gabii dayun sa prosesyon.
Si Diola nitug-an nga sayo sa siglo 1900, daghan mulopyo sa Mambaling ang naluwas sa peste tungod sa pangama ni San Roque hinungdan nga giawhag niya ang katawhan nga moapil sa kalihukan.
Samtang giawhag sa Department of Labor and Employment ang tanang pribadong establisemento sa pagpatuman og mga lakang batok sa nCoV sa ilang mga emplyedo.
Matud ni DOLE-7 Director Salome Siation nga ang Labor Advisory No. 4 gipirmahan ni DOLE Secretary Silvestre Bello III niadtong Enero 31.
Gawas sa sakto nga impormasyon, kinahanglang limpyohan sab ang work areas og disinfectants ug seguraduhon nga dunay tubig, sabon ug sanitizer sa tanang washrooms ug comfort rooms.
Seguraduhon sab nga ang pagkaon sa canteens maayong pagka-andam ug pagkaluto.
Kinahanglan sab nga tanang trabahante baskog ang panglawas ug motawag dayon sa sa mga health authorities ilabi na sa Department of Health kun dunay makita nga posibleng natakbuyan sa maong virus.
Kadtong mga empleyado nga ipaubos sa quarantine mahimong maka-avail sa ilang sick ug vacation leave ug tugtan sab nga mag-leave without pay ang empleyado.
Mismo ang Cebu City Police Office niawhag sa ilang mga sakop alang sa healthy lifestyle subay sa mando ni CCPO Director Engelbert Soriano.
Matud ni Sorianonga gikinahanglang himsog ang paglawas ug sa tibuok pamilya ug mag-inom og bitamina.
Gi-monitor sab sa kapolisan ang mga sakop nga gituohan nga adunay sakit. Decemay P. Padilla, Sheriza Mae R. Uy/GMR (BANATNEWS)