CEBU, Philippines — Giaprobahan sa konseho sa Siyudad sa Sugbo ang pagwagtang sa tanang bayranan sa mga dokumento sa rehistro atol sa One-Day Free Issuance of Civil Registry Documents karong Pebrero 14 ug ang Delayed Registration of Birth sa tibuok buwan sa Pebrero 2020. Ang Pebrero gisaulog sa Office of City Civil Registrar (OCCR) nga Civil Registration Month aron pagpahinumdum sa mga Pilipino sa ilang katungdanan nga magparehistro.
Kalabot sa selebrasyon, sa usa ka suwat nga gipetsahan og Enero 16, 2020, ang OCCR nangayo og suporta ni Konsehal Renato Osmeña Jr. aron pagpasar sa ilang mga sugyot sa konseho sa ilang giplano nga kalihukan. Usa niini ang paghimong libre sa sertipiko sa birth, marriage, ug death sa One-Day Free Issuance of Civil Registry Documents karong Pebrero 14 ug ang delayed nga pagrehistro alang sa birth sa tibuok buwan.
Ang resolusyon mag-awhag sab sa City Legal Office nga maghatag og tabang sa tanang kliyente kalabot sa pag-andam sa affidavit ug uban pang legal nga dokumento ug libre nga notaryo. Mga notary gikinahanglan sa Affidavit of Legitimation, Acknowledgment, Joint Affidavit of Witnesses; Affidavit of Delayed Registration ug uban pa.
Ang kalihukan ubos sa panagtambayayong sa Philippine Statistics Authority (PSA). /GMR (BANATNEWS)