CEBU, Philippines – Napusilan patay sa mga polis ang subject sa gipahigayon nga buybust operation nga gipahigayon sa Waterfront Police Station sa Sitio ICM, Villagonzalo II Barangay Tejero Dakbayan sa Sugbo.
Giila ang subject sa maong operasyon mao si Ricardo Valdueza alyas “Cardo”, 51 anyos nga nagpuyo sa maong lugar.
Dali nila kining gidala sa tambalanan apan gideklara kini sa mga doktor nga dead on arrival tungod sa samad pinusilan niini sa lawas.
Nasikop hinuon sab ang kauban niini nga si Barbra Natividad Delos Santos 46, nga nagpuyo usab sa maong lugar.
Sa imbestigasyon sa Waterfront Police Station nga sa dihang dakpon na si Valdueza kalit kini nga namusil sa mga polis apan ang naigo mao ang iyang silingan nga si Joel Juson Ouano, 53 anyos.
Si Ouano gidala sa usa ka pribadong tambalanan human nakaangkon og samad pinusilan sa tiyan.
Gipanalipdan sab ni Cebu City Police Office (CCPO) Director Police Colonel Engelbert Soriano ang mga operatiba nga nakapatay sa ilang target human nga misukol kini sa kapolisan ug nakigpinusilay gyud kini sa dihang nakabantay nga polis ang iyang katransaksyon.
Gipasabot ni Soriano nga wala siyay nakitang kalapasan sa iyang mga sakop sa gihimong anti-drug operation tungod kay misukol man ang ilang target.
“It was a buy-bust operation. Legitimate buy bust operation and nagulat yung tropa natin nang bigla na siyang nagpaputok,” matud pa ni Soriano.
Gi-monitor usab nila ang sitwasyon sa biktima nga naa na karon sa tambalanan kinsa giduaw ni Police Brigadier General Valeriano de Leon aron masusi ang kahimtang sa napagan. Gituohang miyembro sa usa ka sindikato sa illegal nga drugas si Valdueza nga naglihok sa dakbayan ug lalawigan sa Sugbo.
Gihulagway kini ni Soriano nga adunay daghang drug group nga naa sa siyudad sa Sugbo diin ang mga sakop niini dugay na sa illegal nga negosyo ug ang uban bag-o pa usab.
Moabot ngadto sa 50 ka mga drug personalities ang naa sa listahan sa Cebu City Police Office nga padayon nila nga gibantayan.
“Nako, napakarami, bago at luma. Meron kaming listed. Pare-pareho silang na-involve eh, ngayon may 50 listed tapos may bago,” dugang ni Soriano.
Gipasalig ni Soriano nga ang nahitabo sa Tejero sinugdanan palang kini sa ilang mas pahugtan pa nga anti -drug operations batok sa mga nalambigit sa illegal nga drugas.
Mando niya sa iyang mga sakop nga dili mokompyansa ug sul-obon kanunay ang ilang mga bullet proof vest alang sa ilang proteksyon. /IBM (BANAT NEWS)