CEBU, Philippines — Giisip nga mabulokon ug luwas nga nagmalampuson ang mga gipahigayong relihoyosong kalihokan dinhi sa Metro Cebu pahinungod sa Senyor Sto. Niño nga gihimo gikan sa Cebu City, Mandaue City ug sa Lapu-Lapu City nga gikuyogan sa gibanabanang tulo ka milyong deboto.
Ang kalihokan gisugdan sa Walk with Mary Biyernes sa kaadlawon sa Cebu City ug gisunod ang traslacion padung sa Mandaue City dayon ang prosisyon padung sa Lapu-Lapu City ug ang kagahapon ang fluvial procession ingon man Solemn Foot Procession.
Sa maong mga kalihokan, gidala ang mga imahen sa Senyor Sto. Niño, Birhen sa Guadalupe ngadto sa National Shrine of Saint Joseph sa Mandaue City ug padung sa Birhen sa Regla sa Barangay Poblacion sa Dakbaayan sa Lapu-Lapu.
Ang kabugnaw sa sayong kaadlawon wala makapakgang sa liboan ka mga deboto gikan sa Mandaue ug Lapu-Lapu nga naghatud ug nagpaabot diha sa tiilan sa Sergio Osmeña Bridge o naila nga Mactan Mandaue Bridge sa habig sa Barangay Pajo sa Dakbayan sa Lapu-Lapu.
Ang deboto nga mga Oponganon kauban sa mga Cordovanhon nga gibanabana ni Police Colonel Clarito Baja nga maoy direktor sa Lapu-Lapu City Police Office (LLCPO) misugat sap anon nilang Mandaue City Mayor Jonas Cortes nga gitagbo usab ni Mayor Junard Chan sa Dakbayan sa Lapu-Lapu.
Si Mayor Chan maoy nangulo sa mga deboto uban sa kaparian sa pagpadayon sa Traslacion motorcade subay sa M.L. Quezon Avenue hangtod na paghidangat Nuestra Señora Virgin dela Regla Shrine sa Lapu-Lapu.
Human sa Santos nga Misa, gidala ang mga imahen ngadto sa Naval Forces Central (Navforcen) sa Barangay Looc ug misunod dayon ang fluvial procession pabalik sa Cebu City.
Ang mga imahen gikarga sa LCT Teofilo Camomot nga giabyan sa 179 ka mga nagkalain-laing gidak-on sa mga sakyanan sa kadagatan. Apil sa mga barkong nanguyog ang gikan sa Philippine Navy, Philippine Coastguard, Bureau of Fisheries and Aquatic Resources, Maritime Police, mga tugboats ug RoRo nga barko hasta mga pribadong yati.
Sama sa naandan, tanang mga barkong gigaid sa pantalan mibusina agi og pagsaludo sa Balaang Bata samtang kaliboan sa mga deboto sab ang misaksi diha sa pidpid sa baybayon.
Pagabot sa Pier Uno gisugat ang prosisyon og kaliboan gihapon nga mga deboto ug gihatud balik sa Basilica Minore del Sto. Niño alang reenactment sa Unang Bunyag. Si Lieutenant Junior Grade Michael John Encina nga maoy tigpamaba sa Philippine Coastguard –Cebu miingon nga dul-an 50 mil ka tawo ang nanakay sa mga sakyanan sa dagat nga misalmot sa fluvial procession.
Walay mga kakulian silang natala nga nakabalda sa ka solemni niini maong mahulagway nila kining dakong kalamposan. Hinuon dunay mga motorbanca nga wala magparehistro nga misuway unta sa pagapil apan wala sila tugoti. /IBM (BANATNEWS)