CEBU, Philippines — Giduso ni Konsehal Jerry Guardo ang ordinansahon alang sa “Green Open Parking Space” sa mga parkingan sa mga sakyanan.
Usa kini sa mga lakang sa kagamhanan sa Dakbayan sa Sugbo sa pag-amping ug pagpanalipod sa kalikupan labi na sa paspas nga pag-uswag sa mga real estates ug mga land development projects.
Ang gisugyot nga ordinansahon alang kini sa tanang bakante nga parkinganan o mga luna nga gigamit alang sa katuyoan sa komersyo ug industriya.
Tungod kay ang kadaghanan sa mga parking areas sa siyudad hawan, gisugyot sa ordinansahon nga tanoman og mga punoan sa kahoy aron makahatag og landong.
Uban sa mga proyekto nga earth-balling sa Department of Public Works and Highways, kining mga bakante nga parkinganan magsilbi usab nga lugar nga relocation site alang sa mga punoan nga naapektuhan sa mga proyekto sa gobiyerno.
“Eventually, mao na ni atong direction, once naay na earth-ball na tree duna tay ka-transfer-ran,” matud ni Guardo.
Ang balaud apil na unya nga tumanon sa mga establisemento sa pagplano pa lang sa proyekto ug sa dili sugdan ang paghimo sa mga parking spaces.
Ang mga ahensiya nga mohatag og certification maglangkub sa Cebu City Environment and Natural Resources Office, Cebu City Planning and Development Office, Cebu City Engineering Office ug Office of the Building Official.
Ang kagamhanan sa siyudad nagpatuman sa programa nga “Kakayuhan Alang sa Kaugmaon” nga nagtumong sa pagtanom og tulo ka milyon ka punoan sa kahoy sa tulo ka tuig aron pagsagang sa epekto sa climate change. /GMR (BANATNEWS)