CEBU, Philippines — Gisugdan na ang pagsuroy sa Jubilee Cross ug imahen sa Balaang Bata nga si Senior Santo Niño sa mga parokya.
Kini human sa Santos nga Misa sa pagbukas sa 500 years countdown atubangan sa Magellan’s Cross nga gipangulohan ni Archbishop Jose Palma kagahapon sa buntag nga gitambungan sa kaparian sa Archdiocese of Cebu, mga opisyal sa dakbayan, ug liboan ka layko.
Matud ni Palma nga ang duha ka imahen sa Kristiyanismo isuroy sulod sa 500 ka adlaw una kini ibalik sa Abril 2021. Sumala pa ni Palma nga usa ka mabulokon nga selebrasyon ang 2021 tungod kay ang unang bunyag nahitabo man gyud sa Sugbo ug adunay panagtambayongay ang simbahan ug ang gobiyerno.
Adunay nagkadaiyang kalihukan ang giandam sa archdiocese diin usa na niini ang gisugdan na nga Duaw Parokya diin una niini ang Cebu Metropolitan Cathedral.
Si Fr. Andrei Ventanilla sa Commission on the Youth nitug-an nga 250 ka parokya sa Archdiocese of Cebu ang duawon samtang ang laing 250 adto sa mga nagkadaiyang parokya sa silingan nga mga diocese una ibalik sa Sugbo. /GMR (BANATNEWS)