CEBU, Philippines — Mopahigayon og higpit nga pag-monitor sa kabarangayan sa Dakbayan sa Mandaue ang City Disaster Risk Reduction and Management Office (CDRRMO) tungod sa bagyong Tisoy diin giingong masinati ang mga pag-ulan.
Si Felix Suico, pangulo sa CDRRMO sa dakbayan nagkanayon nga higpit nila nga i-monitor ang mga barangay nga bahaonon ug kadtong nahimutang sa kabukiran tungod kay delikado kini sa pagdahili sa yuta.
Si Engineer Al Quiblat, Jr. sa Philippine Atmospheric Geophysical and Astronomical Services Administration (PAGASA)-Mactan nagkanayon nga tungod sa bagyong Tisoy nga mosulod sa Philippine Area of Responsibility (PAR) masinati ang panagsa nga bundak sa kusog nga uwan, panugdog ug kilat karong adlawa.
Ang maong bagyo gibanabanang adto mag-landfall sa habagatang bahin sa Luzon ug dili kaayo kusog ang epekto niini dinhi sa Sugbo. /BDB (BANATNEWS)