CEBU, Philippines — Gitanggong sa detention cell sa kapolisan ang usa ka lalaki nga nadakpan sa akto sa sulod sa gilungkab niining tindahan sa Sitio Guimba, Barangay Canamocan, Compostela.
Si Police Master Sergeant Renato Inot sa Compostela Police Station niila sa nadakpan nga si Mark Lloyd Saholan, 40-anyos, ulitawo nga taga Barangay Tabok, Lungsod sa Liloan ug nagtrabaho isip security guard.
Matud ni Inot nga ang Seria Store nga nahimutang sa nahisgutang lugar ang gitripingan sa suspek sa paglungkab ang pultahan dihang nilabay kini sa lugar.
Dugang ni Inot nga hubog na ang suspek sa giinom niining beer ug mga energy drink dihang naaktohan kini sa nag-roving nga lady guard nga si Editha Rebalde hinungdan nga dali kining gidakop ug gidala sa buhatan sa kapolisan.
Si Inot niingon nga gidala sa ilang buhatan ang mga botelya sa beer nga nahurot na sa pag-inom sa suspek hangtud nga nahubog ug wala na kini makalihok sa iyang gilingkuran sa sulod sa maong tindahan.
Samtang usa ka notadong manglungakabay ang gitan-aw sa Waterfront Police Station nga responsable sa pagpanglungkab sa usa ka tindahan sulod sa mall sa dalan Colon, Dakabayan sa Sugbo.
Kini ang gibutyag ni Waterfront Police Station chief, Police Major Jomar Pomarejos, base sa impormasyon nga ilang nakuha.
Dugang ni Pomarejos nga suhito ang responsable sa pangpanglungkab tungod ky nakasulod gyud kini ngadto sa tindahan.
Sa pagkaron gisubay pa nila ang ilang person of interest sa maong panghitabo.
Mokabat sa kapin P50 mil ang balor sa mga tinda ang nadala sa suspek nga naglakip sa jacket, shorts ug t-shirt.
Susihon pa usab sa kapolisan ang closed circuit camera footage sa mall.
Subay sa nagsingabot nga Pasko, giawhag ni Pomarejos ang mga tagdumala sa malls ug uban pang establisemento nga magmabinantayon ug seguraduhon nga sirado pag-ayo ang ilang lawak aron malikayan ang pagpanglungkab. GMR (BANATNEWS)