CEBU, Philippines – Giangkon sa mga manindahay og buwak atol sa kalag-kalag nga mopausbaw gyud sila sa presyo niini.
Kini sumala pa sa usa ka Marilyn Bismayor, 51, taga bukirang bahin sa Dakbayan sa Sugbo nga namaligya og mga buwak sa Dakbayan sa Mandaue.
Matud niya nga depende sab sa klase sa buwak nga maoy sagad paliton sa mga mamalitay nga ihalad sa mga lubong.
Kini naglakip sa chrysanthemums nga maoy sagad paliton nga nagsimbolo sa kamatayon ug kasub-anan, kamatuoran, positibo nga panglantay ug kalipay.
Samtang ang rosas maoy giagad sa iyang kolor nga maoy himalitan nga nagpasabot kini sa gugma nga walay pagkapapas alang sa namatay nilang mahal sa kinabuhi ug ang puti nga rosas maoy gipasabot ang pagkaligdong, pagpaubos, pagka-inosente, ug kabatan-on.
Ang pula nagsimbolo sa pagtahud ug gugma samtang ang kolor pink nga rosas nagpasabot kini og grasya ug pagdayeg, ang abuhon nagpasabot sa kaguol ug ang yellow nagpadayag og lig-on nga paghinigalaay. (/GMR)(BANAT NEWS)