CEBU, Philippines – Gitaktak sa ilang trabaho ang lima ka job order nga kawani kinsa nadestino diha sa Material Recovery Facility (MRF) sa kagamhanan sa Dakbayan sa Lapu-Lapu human sila gireklamo sa duha ka establisamento nga giingong nangayo og kwarta.
Si Mayor Junard Ahong Chan nagkanayon nga ang mga nagdumala sa duha ka mga establisamento nga nahimutang sa maong dakbayan ang nakigtagbo kaniya ug nipadangat sa ilang reklamo batok sa maong lima ka kawani sa MRF nga giingong nangayo og P1,500 nga kwarta.
Matud ni Chan nga ang maong kantidad nga kolektahon sa nahisgutang mga kawani sa MRF maoy bugti sa dili na lamang pagluwat og citation ticket sa kapakyas sa pagbahig sa malata ug dili malata nilang mga basura.
Gibutyag ni Chan nga usahay giingong ang iyang pangalan gamiton sa maong mga kawani sa pagsiguro nga mohatag kanila ang establisamento nga ilang gipangayoan.
Si Chan niawhag sa mga nabiktima sa mga kawani sa pagtaho ngadto sa iyang buhatan tungod kay makahatag kini og dautang imahen sa kagamhanan sa siyudad.
Sa laing bahin, gitaktak ni Chan ang duha ka kawani sa city hall kinsa nagpositibo sa paggamit sa ilegal nga drugas sa kinalit nga drug test nga gihimo ug gisundan usab kini sa laing pito ka personnel sa City Traffic Management System (CTMS) nga nagpositibo usab sa paggamit sa ilegal nga drugas. (/BDB)(BANAT NEWS)