CEBU, Philippines — Ang kihante sa kasong plunder batok ni Mandaue City Mayor Jonas Cortes ang nitanyag og P1.8 milyones alang sa pagbawi sa luna sa siyudad nga gibaligya sa tag P50 matag metro kwadrado.
Si Abner Quino nitanyag niini pinaagi sa usa ka suwat nga gipadangat niya niadtong Septiyembre 16, 2019 kang Mandaue City Vice Mayor Glenn Bercede.
Sa maong suwat si Quino nihangyo kini sa konseho sa pagsuta kung unsay tinuod sa maong transaksiyon niadtong 2015. Buot ni Quino nga masayud kung ang pagbawi sa maong luna usa ba sa tumong sa konseho.
Kung mouyon ang konseho sa iyang hangyo, si Quino nipadayag nga andam siya mobutang og trust account sa kantidad nga dili mosobra sa P1.8 milyones bugti sa ilang kagustohan.
“The sole purpose of which is to reimburse the city if it decides to buy-back the property it unwittingly sold to ECODEMCOR for P1.7 million more or less,” matud ni Quino sa iyang suwat.
Dugang niini, si Quino nipasalig nga iya sab bakwion ang tanang niyang pamahayag batok kang Cortes ug kaubanan basta lang mabalik ngadto sa katawhan sa Dakbayan sa Mandaue ang nahisgutang luna.
Ang kampo ni Cortes ug Bercede nagdumili pa sa pagluwat og pamahayag sa maong suwat ni Quino. (BANATNEWS)