CEBU, Philippines – Magtiayong Dionesio ug Thelma Chiong, mahinangpon ug malipayon nga nitahan na pagbalik sa Bureau of Corrections ang laing duha ka mga akusado nga ni-kidnap ug nipatay sa ilang duha ka anak nga babaye pipila na ka tuig ang nilabay.
Matud pa ni Thelma kinsa nahinabi sa Banat News, malipayon sila nga nitahan na gayud sa ilang kaugalingon sila si Josman Aznar ug James Anthony Uy, bisan pa man og gihurot nila ang 15 ka adlaw nga gihatag nga tagal ni Presidente Rodrigo Duterte sa mga nakagawas sa prisohan tungod sa kontrobersiyal nga Good Conduct Time Allowance (GCTA) Law.
Dugang pa ni Thelma, atol sa pagtahan nila ni Aznar ug Uy, Miyerkules sa gabii mura siya’g naibtan og tunok. Ang duha mao nalang ang nahibiling mga kombiktado sa pagpatay sa ilang mga anak nga silang Mary Joy ug Jacquelyn.
Una nang nitahan sa ilang kaugalingon human sab nakagawas pinaagi sa GCTA silang Ariel Balansag ug Alberto Caño tungod gihapon sa mando ni Duterte. Nakombikto sa maong kasong paglugos ug pagpatay sa managsuong Chiong sila si Francisco Juan “Paco” Larrañaga, Jozman Aznar, Rowen Wesley Adlawan, Alberto Allan “Pahak” Caño, Ariel Balansag, James Andrew “MM” Uy ug James Anthony Uy, nga gibansagang Chiong 7. Si Larañaga kinsa anak sab sa usa ka prominenteng pamilya dinhi sa Sugbo ug dunay dual citizenship gipabalhin og priso didto sa Espanya.
Una niini, ang Chiong 7 gisentensiyahang bitayon pinaagi sa lethal injection sa Korte Suprema niadtong 2004 apan human gibasura ang death penalty pinaagi sa Republic Act 9346 gihimo na kining pagkapriso tibuok kinabuhi nga way parole.
Sumala pa ni Thelma, ang iyang pamilya magpamisa pasalamat sa pagtahan sa upat ka mga kombiktado ug kang Duterte. Samtang si PRO 7 Regional Director Brigadier General Debold Sinas, padayong niawhag sa mga kombiktado sa mga bangis nga krimen nga nakagawas tungod sa GCTA sa pagtahan sa ilang kaugalingon kay ipaagi man gihapon sila ug proseso diha sa mga police station una i-turn over sa buhatan sa CIDG 7.
Aduna na karoy tracker team ang CIDG 7 nga gitahasan paggukod niadtong mga wala pa mobalik og tahan nga gikonsiderar na karong mga pugante human napupos ang ultimatum ni Duterte. (/IBM)(BANAT NEWS)