CEBU, Philippines – Human nakadawat og pagsaway gikan sa mga netizens, giklaro sa Mactan Cebu Bridge Management Board ang lakang nga ilang gipatuman sa duha ka taytayan.
Daghan ang nisupak sa pag-ban sa mga bisekleta nga molabang sa taytayan apan si MCBMB chairman Gobernador Gwendolyn Garcia nitataw nga subay sa balaud ang ilang lakang.
“Biking across the bridge whether for recreation or for travel necessity is prohibited. Mogamit ka’g non-motorized vehicle nga molabang ka sa tulay that is prohibited by Republic Act 4136,” matud ni Garcia.
Hinoon gitugot na sa MCBMB ang pagpalabang sa biseklita apan dili sakyan. “So that ato ni i-one way one way ang pedestrian, so crossing to Lapu-Lapu walk left aron makita nimo kasugat sa sakyanan, going to Mandaue pud ka walk left pud ka aron kita ka sa sakyana dili ka pataka og step,” matud ni Atty. Rory Jon Sepulveda, consultant sa gobernador.
“Sa newer bridge kay bag-o naman na sya nga infra, naa naman define nga pedestrian pathway, you can use that which side of the bridge,” dugang ni Sepulveda.
Si Garcia nagkanayon nga istrikto ang ilang ipatuman sa unang taytayan ilabi na nga walay railings.
“Kun magsugat mo diha unya daghan kayo, ang tendency ani mo-step ka into the vehicular lane so mas kuyaw pa hinoon, so we will require one way nga passage for pedestrians and those with bicycles nga magduso na sa ilang bisekleta,” matud ni Garcia.
Alang sa hugot sa seguridad sa taytayan adunay mga police personnel nga magbantay niini ug may mga CCTV cameras sab nga ibutang.
Dugang ni Garcia nga kalabot sa pagdili nga molabang sa taytayan gikan sa ala 1 sa kaadlawon hangtud sa alas 5 sa buntag ang ila pa nga hisgutan sa MCBMB. (/GMR)(BANAT NEWS)