CEBU, Philippines – Pagtinabangay sa mga opisyal sa Siyudad sa Sugbo ang nakita ni Cebu City acting Mayor Michael Rama nga mapugngan ang pagtubo sa bayranan sa kalangan sa pagpatuman sa Cebu Bus Rapid Transit Project.
Kini ang iyang reaksyon dihang gipangutana kabahin sa report sa Commission on Audit ngadto sa Department of Transportation kabahin sa P16.7 bilyones nga BRT Project.
Giingong ang gobiyerno kinahanglan magbayad og P22.9 milyones sa commitment fees sa niaging upat ka tuig tungod sa pagkalangan sa pagpatuman sa proyekto.
Kahinumduman nga ang Gobiyerno sa Pilipinas (GOP) nisulod sa usa ka $198.5 milyones (P10.6 bilyones) nga kasabutan sa utang sa World Bank (WB) ug Agence Francaise De Developpement (AFD) alang sa pagpatuman sa BRT niadtong 2014. Ang utang giingong dunay closing date karong tuig 2021.
Si Rama niingon nga wala pa niya masusi ang nawala nga mga dokumento sa proyekto sa BRT sanglit wala na siya kabalik sa iyang katungdanan niadtong 2016 human napilde sa pagka-mayor.
Human niini giingong gisuspenso sa Malakanyang ang proyekto hinungdan nga wala niya mapadayon ang iyang mga file ug mga rekord.Gipunting ni Rama ang kabahin sa rota sa BRT gikan sa South Road Properties hangtud sa N. Bacalso Avenue ug Osmeña Boulevard hangtud sa N. Escario Street ug Ayala sa I.T. Park.
Apan gipahibawo na sa Technical Support Consultant ang mga opisyal sa siyudad nga ang BRT System naglakip sa usa ka feeder system gikan sa Mambaling hangtud sa Bulacao hangtud sa Talisay City ug gikan sa I.T. Park sa Banilad-Talamban corridor nga mogamit sa PUV modernization program sa nasudnong gobiyerno.
Matud ni Rama nga ang orihinal nga konsepto mao ang paglakip sa Bulacao hangtud sa Ban-Tal area alang sa agianan sa BRT.
Dugang ni Rama nga ang kausaban sa rota aprobahan pa sa konseho sa siyudad pinasikad sa Local Government Code ug i-review sa National Economic Development Authority. (/GMR)(BANAT NEWS)