CEBU, Philippines — Mobalor ngadto sa P21.6 milyon balor sa gituohang shabu ang nasakmit sa kapolisan sa Dakbayan sa Sugbo ug Mandaue atol sa sagunsong buy bust operations kagahapon.
Unang nasikop sa operasyon kagahapon sa alas tres sa sa hapon didto sa Sitio Lumbane Guadalajara, Barangay Guadalupe ang usa ka giila nga si Myla Delumbar,29, taga Pasil, Cebu City apan nag-abang og balay sa maong dapit.
Nakuha gikan kaniya ang kapin sa usa ka kilong shabu nga gisulod sa blue nga plastic bag nga mobalor sa P7 milyones. Nakasibat ang iyang kapuyo kinsang gituohang kakunsabo sab niini nga si Gilbert Granada Claros,26.
Matud ni Police Major Dindo Alaras hepe sa Guadalupe Police Station high value target sa regional level ang duha ug lapad ang distribusyon niini.
Si Delumbar dunay lima ka buwang masuso hugtanong mihimakak nga iyaha ang illegal nga drugas nga nakuha sa kapulisan ug mipasangil nga iyang kapuyo maoy tagiya niini apan wala siya magtuong magdala kini og drugas sa ilang pinuy-anan.
Giingong gibutyag niini ang tig-supply og shabu sa duha gikan sa Sitio Mahusay, Barangay Subangdaku, Dakbayan sa Mandaue.
Sa follow up operation diha sa Subangdaku, P14.6 milyones balor sa gituohang shabu nasakmit kagahapon sa hapon sa mga sakop sa City Drug Enforcement Unit sa Mandaue City Police Office gikan sa suspek nga si Vicente Deloy Dungog Jr., alyas Bentoy, 32, taga Sitio Lumbane, Barangay Guadalupe, Dakbayan sa Sugbo. Positibong napalitan sa poseur buyer ang suspek og usa ka medium nga paketeng gituohang shabu ug aduna pay nakuhang laing usa ka dakong plastik ug duha ka extra- large nga plastic nga pulos adunay sud nga gituohang shabu.
Ang maong illegal nga drugas adunay gibug-atong 2.150 kilo nga kun basehan ang Dangerous Drug Board (DDB) mobalor na kini og P14,350,000.
Ang kapolisan naghimo pa og dugang imbestigasyon batok sa suspek ug kun kinsa ang iyang mga kauban sa grupo. (IBM) (BANATNEWS)