CEBU, Philippines — Gidudahang kampo sa New People’s Army nga gituohang pabrika og mga improvised explosive device (IEDs) gironda sa pwersa gobiyerno niadtong Domingo sa buntag. Tulo ang nadakpan nga mga gituohang mga miyembro sa Yunit Militia sa NPA nga giila nga silang: Roberto Pracio Tingson 34; Jory Toledo Mate alyas Vic-Vic, 38, mga residente sa Sitio Cabilocan, Barangay Camindangan, Sipalay, Negros Occidental ug ang usa ka nagpaila lang nga si Amado nga maoy gitumbok nga IED manufacturer expert.
Matud pa sa direktor sa Police Regional Office-7 nga si Police Brigadier General Debold Sinas, milusad og operasyon ang Armed forces of the Philippines inubanan sa kapolisan didto sa maong kampo.
Pagabot sa lugar, giingong nakaengkwentro nila ang lima ka mga nagbantay sa maong kampo sud sa napulo ka minutos hangtud nga nangikyas ang mga armado ug gibiyaan ang duha. Nadiskubrehan sa mga payag ang klase-klaseng mga materyales sa paghimo og IED. Aduna usab unom ka mga bag-ong nahuman na nga mga IED. Matud pa ni Sinas base sa ilang intelligence monitoring, 20 na ka IEDs ang nakompleto og himo sa maong kampo, mao nga ilaha karong gipangita kun asa ang 14 pa ka mga IED. (IBM) (BANATNEWS)