CEBU, Philippines – Kapolisan andam nga mosikop ni kanhi Daanbantayan, mayor Maria Luisa Loot, asawa ni kanhi police general Vicente Loot nga kanhi mayor sab sa maong lungsod.
Ang direktor sa Police Regional Office-7 nga si Police Brigadier General Debold Sinas nagkanayon nga gipaabot pa nila nga mogawas ang warrant of arrest batok niini.
“Of course (dakpon), Once we received the warrant we will implement it properly,” sigun ni Sinas.
Sa report sa Philstar.com, si Maria Luisa ug ang konsehal nga si Samuel Moralde gisentensyahan na og unom ngadto sa walo ka buwan nga pagkabilanggo sa kasong graft ug duha ngadto sa pito ka tuig alang sa malversation.
Niadto pang Agosto 2 nadesisyonan sa Sandiganbayan ang maong kaso apan migawas ang warrant Agosto 14, Miyerkules.
Nag-ugat kini sa dihang gireklamo ang duha nga mitugot nga magpa-loan og tunga sa milyon ka pesos ngadto sa RBA Quail Raisers Association niadtong tuig 2007 diin chariman niini si Moralde.
Nadiskobrehan sab nga misulod si Maria Luisa og memorandum of agreement (MOA) niadtong Pebrero 28, 2007 diin ang Daanbantayan maoy mo finance sa quail egg farming operation isip livelihood project sa lungsod.
Apan wala kini naaprobahan sa Sangguniang Bayan sanglit dili accredited nga organisasyon ang RBA niadtong tungora. Giingong wala sab mo-comply silang Maria Luisa ug Moralde sa kondisyon sa MOA diin ilang monitoron ug dunay regular nga i-evaluate ug wala sab mabayri ang gi-loan sa maong organisasyon.
Si Maria Luisa kapikas ni kanhi heneral Loot kinsa gipasanginlan ni Pres. Duterte nga narco-politician, ang lalaking Loot kusganong mihimakak sa mga pasangil sa presidente. (/IBM)(BANAT NEWS)