CEBU, Philippines — Bagong direktor sa Negros Oriental Provincial Police Office pormal na nga molingkod karong adlawa.
Si Police Colonel Rizalito Gapas mao ang gitahasang sa kadagkuan sa Kampo Crame nga maoy molingkod isip direktor sa NORPPO.
Sa wala pa molingkod si Gapas sa pagka-provincial director, nag-hepe kini siya sa Pasay City Police Office.
Karong adlawa walay mahitabong turn over ceremony gikan sa kanhi direktor sa NORPPO sanglit girelibohan na kini.
Kahinumduman nga mismong si Philippine National Police Director-General Oscar Albayalde maoy nirelibo sa kanhi direktor sa NORPPO nga si Police Colonel Raul Tacaca.
Kini aron mamahimong patas ang himoong fact-finding investigation sa kadagkuan sa Kampo Crame subay sa sunod-sunod nga patay sa maong probinsiya.
Kahinumduman nga sulod lang sa usa ka semana niadtong Hulyo niabot sa 15 kabuok ang sunod-sunod nga gipamusil patay.
Nagsugod kini niadtong Hulyo 18 diin upat ka polis ang gipangkulata ug gipamusil patay sa mga armadong grupo nga gituohang mga sakop sa rebeldeng New People’s Army.
Human sa lima ka adlaw, Hulyo 23 gibanhigan sa Sitio Looc, Barangay Poblacion, Guihulngan City, Negros Oriental ang abogado nga si Atty. Anthony Trinidad, 53, samtang naangol ang asawa niini.
Pagkaugma niana gibanhigan patay ang usa ka rebel returnee nga si Weny Alegre, 37, ug si Felimino Janayan, presidente sa United Calango Farmers Association.
Ang labing dugoon sa tanan mao ang pagka Hulyo 25 diin niabot og pito kabuok ang napatay sulod sa 24-oras.
Lakip sa gipusil patay ang managsuong school principal ug kawani sa Department of Education.
Gitahasan sa direktor sa Police Regional Office-7 nga si Police Brigadier General Debold Sinas ang iyang Deputy Regional Director for Operations nga si Police Colonel Anghelito Dumangueng nga maoy officer-in-charge sa NORPPO samtang wala pay order kun kinsa ang mopuli isip provincial director.
Sa pagkakaron anaa sa floating status si Tacaca ug samtang nagdagan pa ang imbestigasyon, adto una kini sa Police Holding and Account Unit (PHAU) sa Kampo Crame. (/GMR)(BANATNEWS)