CEBU, Philippines — Human sa pagsuspenso sa mga duwa sa Philippine Charity Sweepstakes Office (PCSO), ang kagamhanan sa Dakbayan sa Sugbo gikabalak-ang maapektahan ang mga programa niini sa panglawas tungod sa mawala nga labing menos P8 milyones ngadto sa P10 milyones nga bahin matag tuig gikan sa maong buhatan.
Si Atty. Jose Daluz III kinsa special assistant sa mayor miingon nga ang programang City Hospitalization and Medicine Program (CHAMP) pundo sa PCSO ang gisaligan.
“Ang mga nadawat na nato, pwede rana magasto.
But, ang moabot, if naa, dili magamit because of the order of the president,” matud niya.
“Kun i-weigh nimo as to money nga mawala nato, investment, gamay ra compared sa gibuhat sa atong president,” dugang niya.
Matud pa niya nga ang kagamhanan sa dakbayan adunay laing mga tinubdan sa pundo diin ang mga medical programs adtp magkuha og pundo.
Gawas sa PCSO, ang dakbayan makakuha og P4 milyon kada bulan gikan sa Philippine Amusement and Gaming Corp. (Pagcor).
Si Konsehal Raymond Alvin Garcia, chairman sa committee on budget ug finance sa konseho miingon nga magpangutana siya kabahin sa balanse sa mga pundo nga gihatag sa PCSO sa siyudad aron masigurong dili maapektahan ang serbisyo tungod mando sa presidente.
Gawas sa mga pundo nga gihatag sa syudad gikan sa PCSO sa siyudad ang mga lumolupyo sa siyudad nangayo sab og pundo gikan sa maong ahensyaalang sa ilang mga tambal ug mga hospital bills. (BANAT NEWS)