CEBU, Philippines – Nalandig sa tambalanan ang usa ka 16 anyos dalagita human kini nilayat gikan sa Mandaue-Mactan Bridge sa habig sa Barangay Umapad, Dakbayan sa Mandaue, ala una sa hapon adlaw nga Martes. Matud ni Police Corporal Ronnie Padios, Desk Officer sa Mandaue Police Station nakadawat sila og tawag bahin sa usa ka dalagita nga nilayat apan dali ra usab kining nadala sa tambalanan.
Sumala pa ni Padios, ang biktima nakit-an sa usa ka mananagat hinungdan dali kini nga giluwas ug gidala sa daplin kung diin nagpaabot ang ambulansya nga modala niini sa Mandaue District Hospital.
Maghimo pa sila og imbestigasyon kung unsay hinungdan sa paglayat sa maong batan-on. Pagkakaron dili pa nila mahinabi kay gipaubos pa kini sa pagsusi sa mga doktor. (/IBM)(BANAT NEWS)