CEBU, Philippines – Gihatagan og pagtagad karon ni Konsehal Dave Tumulak, Chairman sa Committee on Disaster Risk Reduction Management, Safety and Climate Change Adaptation ang reklamo sa kabaho nga nagagikan sa hugaw nga tubig sa Cebu Provincial Detention and Rehabilitation Center ug Cebu City Jail didto sa Barangay Kalunasan.
Ang konsehal miingon nga gumikan sa sunod-sunod nga pag-uwan ang mga residente ug kaparian sa Our Lady of Guadalupe Parish mireklamo kay nibalik na sab ang baho nga gikan sa wastewater sa CPDRC.
Sa facebook post ni Rev. Fr. Manuel Tan, Team Moderator sa Our Lady of Guadalupe Parish niadtong Lunes, kini miingon nga samtang nag-misa siya sa Langub sa Birhen sa Guadalupe alang sa ika-duhang adlaw sa nobenario matod pa ang tanang nanimba pulos nanampong sa ilong gumikan sa kabaho sa palibot.
“Duha na ka tuig mi nag-antus sa kabaho sa palibot ug sa among pagsang-at sa maong kaso didto sa pangagamhanan nasuta sa City Health nga ang hinungdan sa kabaho mao nga ang Jail naa sa ibabaw sa langub mopabuhagay diay sa ilang hugaw gikan sa septic tank ngadto sa sapa hilabina kon mag-uwan. Walay action nga gihimo ang buhatan sa mayor ug sa gobernador batok sa among reklamo, mao nga misumbong kami sa Ombudsman pinaagi ni Atty. Eugene Orbita. Human sa pipila ka mga bulan mipadala ang Ombudsman og desisyon nga GRABI KA BAHO!”, tipik sa post ni Rev. Fr. Tan.
Si Tumulak miingon nga nanawag siya sa Department of Public Services ug gihangyo nga habwaan kanunay ang septic tank sa maong mga pasilidad samtang nagpaabot sa proseso nga ma-finalize ang rehabilitation sa water treatment facility.
“Gikan gyud na sa duha ka mga jail, gikan sa City Jail ug CPDRC sa duha ka facility, tungod na sa kana ba naguba na ang water treatment. Pahabwaan nato sa DPS, saction, gahapon nagsugod”, matod sa Konsehal.
Sutaon ni Tumulak kun unsa nay kahimtang sa rehabilitation plan sa water treatment facility ilabi na karon nga bag-o na sab ang mga opisyales sa City Hall.
“Naa naman tay water treatment facility diha unya for rehab nag-allocate ang previous administration og budget para diha dili momenus mga P2 million para sa water treatment facility”, asoy ni Tumulak.—/LPM (BANAT NEWS)