CEBU, Philippines — Naangol ang usa ka 19-anyos nga estambay human napagan sa nahitabong rambol sa mga batan-on sa gawas sa tunghaan sa Barangay Luray Dos sa Dakbayan sa Toledo niadtong Byernes sa alas sais sa gabii.
Ang biktima giila nga si Arnel Madrid Basillote, 19, taga Barangay Dumlog, Toledo City.
Sa pasiunang pakisusi ni Police Chief Master sergeant Thule Tahadlangit, giingong gisugat ni Basillote ang iyang hinigugma nga tinun-an sa Grade 9 sa Luray Dos National High school. Apan samtang nagpaabot si Basillote sa eskina adunay karambolang nahitabo tali sa grupo sa mga batan-on. Matud pa nga sa pagdinaganay sa mga nagkarambola, napunta ang usa kang Basillote ug natumba. Gitabangan niya kini sa pagpabarog apan giapil siya pagdunggab diha sa bukobuko sa kaaway sa maong tinun-an.
Daling nidagan palayo ang biktima ug nagpadala sa tambalanan. Ang kapolisan nisubay karon sa maong insidente.(/IBM)(BANATNEWS)