CEBU, Philippines – Gisugyot ni Police Colonel Limuel Obon, direktor sa Lapu-Lapu City Police Office ngadto kang Mayor Jonard “Ahong” Chan nga paabuton si Kongresista Paz Radaza karong adlawa aron malinawong masulbad ang ilang panagbangi mahitungod sa pagbaton og district office sa city hall.
Nunot niini, nagbutang si Obon og mga polis aron malikayan nga adunay mahitabong kagubot.
Nasayran nga si Mayor Chan nagtinguha sa pagpahimutang sa iyang opisina sa naandang buhatan sa mga nangaging kongresista sa Lapu-Lapu.
Gani mihatag kini og ultimatum niadtong Lunes sa pagbakante sa maong buhatan sulod sa 24 oras. Apan wala kini panumbalinga ni Radaza sanglit gisandigan niini ang ordinansa nga giaprubahan niadtong Hunyo 6, 2019 o 24 ka adlaw sa dili pa mapupos ang iyang termino nga nagtugot sa pagpahimutang sa opisina sa kongresista sa city hall.
Ang mayor miingon nga ang maong ordinansa dili makalabaw sa probisyon sa Local Government Code nga nagtugot sa chief executive sa pagpili og lugar kon asa siya mag-opisina.
Wala mohawa ang mga staff ni Radaza sa maong buhatan subay usab sa iyang kamanduan. Hinuon iyang gimando nga buksan ang buhatan alang sa mayor apan dili pabiyaan ang ilang mga lingkuranan.
Ang chief of staff ni Radaza nga si Atty. Yuri Beluan miingon nga bugtong makapapahaw nila sa district office mao ang kamanduan gikan sa korte. (/DILT)(BANAT NEWS)