CEBU, Philippines — Ang kagamhanan sa Dakbayan sa Sugbo mohatag og mga sakyanan ngadto sa 26 ka barangay sa siyudad.
Sa wala pa ang katapusang adjournment sa ika-14th Sangguniang Panlungsod ang konseho niaprobar sa donasyon sa mga sakyanan nga gipanag-iya sa siyudad ngadto sa 26 ka barangay.
Atol sa regular session niadtong Martes si City Councilor Sisinio Andales nagkanayon nga ang tanang 80 ka barangay makadawat og sakyanan siya ug si Konsehal Eugenio Gabuya, Jr. nisugyot alang sa donasyon sa mga sakyanan ngadto sa kabarangayan.
“These vehicles are already in the possession of the barangays. We are just donating it to them”, matud ni Andales.
Si Andales nagkanayon nga ang pipila sa mga barangay gipirmahan na ang Deed of Donation and Acceptance ni outgoing mayor Tomas Osmeña.
Ang Barangay Tisa makadawat sa upat ka unit sa sakyanan samtang ang mga barangay sa Mabolo, Suba, ug Sudlon I makadawat og tulo ka unit matag usa gikan sa siyudad.
Ang mga barangay nga makadawat og duha ka sakyanan matag usa nila mao ang Malubog, Sudlon II, Tejero, Toong, Tagbao, Lahug, Lorega San Miguel, Luz ug Pamutan.
Samtang ang mga barangay nga makadawat lamang og tag-usa ka sakyanan mao ang Taptap, Talamban, Tinago, Zapatera , Tabunan, Sto Niño, Pahina Central, Pahina San Nikolas, Pari-an, Pit-os ug Bonbon.
Matud usab ni Andales nga ang paghatag sa maong mga sakyanan nagpasabot nga ang mga barangay ang mag-abaga sa pagmentenar, pagpaayo ug alokasyon sa gasolina niini.
Samtang ang president sa Association of Barangay Councils sa Cebu City Chapter ug Kasambagan chairman Franklyn Ong naglaum nga ang bag-ong administrasyon magpadayon sa pagtabang sa mga barangay sa pagmentinar sa mga sakyanan tungod kay wala silay pundo alang niini.
Sa niaging mga semana ang konseho sa dakbayan niaproba na sa donasyon ngadto sa sobra sa 130 ka sakyanan sa nagkalain-laing barangay sa siyudad. (/BDB)(BANATNEWS)