CEBU, Philippines – Kaalyado sa Bando Osmeña Pundok Kauswagan (BOPK) nga si Konsehal Roberto Cabarrubias ug laing walo ka independente nga kandidato nga nangapilde sa niaging ang wala niduso sa ilang tagsatagsa ka Statement of Contributions and Expenditures.
Hangtud alas 8 sa gabii niadtong Huwebes, Hunyo 13, ang tagal sa pagsang-at sa SOCE sa nakadaug ug napilde nga mga kandidato sa buhatan sa Commission on Elections.
Sa 53 ka kandidato sa Siyudad sa Sugbo, 44 lang ang nakasang-at sa SOCE samtang ang siyam mao sila si Cabarrubias, Ale Cabido, Sherwin Abella ug Ely Tumulak sa pagka-konsehal; Federico Perido ug Tony Rosaroso sa pagka-bise mayor; John Edwin Dayon-dayon ug Paul Osmeña sa pagka-mayor ug si Florencio Villarin sa pagka-kongresista sa Cebu City North District.
Pipila ka independente nga kandidato apan napilde ang nakasang-at sa ilang SOCE nga sila si Ricardo Dungog sa pagka-kongresista sa North District, Ian Osmeña, Napoleon Navarro ug Reynaldo Abad sa pagka-konsehal, ug Junrey Concepcion sa pagka-mayor.
Matud ni Comelec Cebu City South District Election Officer, Atty. Marchel Sarno, nga kadtong mga napilde kutob ra gyud niadtong Hunyo 13 ang pagduso sa SOCE.
Samtang kadtong mga nidaug dunay hangtud unom ka buwan apan duna nay multa ug dili sab sila makalingkod sa katungdanan.
Ang administrative fine mag-depende sa posisyon nga gidaganan diin ang city mayors, city vice mayors, house of representative- legislative districts, local political parties (city/municipality), ang first offense naa sa P20,000 ug ang second offense P40,000. Samtang ang Sangguniang Panlungsod (City Councilors) ang first offense P15,000 ug P30,000 ang second offense.
“Hinaot pa nga mo-file sila og SOCE because there are consequences og dili ta mo-file sa atoang SOCE like for example dili ta ka-assume sa atoang position unya after six months ang atong opisina dili na modawat og SOCE,” sigun ni Atty. Sarno.
Samtang hingpit nga nakatuman sa pagsang-at sa ilang SOCE ang mga kandidato Dakbayan sa Mandaue ug Dakbayan sa Lapu-Lapu.
Si Mandaue City Mayor-elect Jonas Cortes nakagasto og P674,300 samtang ang iyang kaatbang nga si outgoing Mayor Gabriel Luis “Luigi” Quisumbing nakagasto og P380,498.
Ang runningmate ni Quisumbing nga si outgoing Vice Mayor Pontico Carlo Fortuna nakagasto og P218,793.18 nga mas ubos kay sa iyang kaatbang nga si Vice Mayor-elect Glenn Bercede nga nigasto lang og P192,032.10.
Si Lapu-Lapu City Mayor-elect Junard “Ahong” Chan nigasto og P297,871 ug ang iyang tandem nga si Vice Mayor-elect Celedonio “Celsi” Sitoy ang nakagasto lang og P75,000.
Dako ang nagasto sa kaatbang ni Chan nga si kanhi kongresista Arturo Radaza nga nitala og P550,550 ug ang tandem niini nga si Konsehal Harry “Don” Radaza nigasto og P390,844.39. (Romeo T. Limpangog/GMR)(BANAT NEWS)