CEBU, Philippines – Lima ka ihawan sa Siyudad sa Sugbo ang gikatakda nga ipasira sunod semana sa Department of Veterinary Medicine and Fisheries (DVMF) gumikan kay wala nila matuman ang angayan sa usa ka ihawan.
Ang maong mga slaughter house nahimutang sa Barangay Mabolo, Capitol Site, Labangon, Banilad ug Mambaling.
Sigon sa pangulo sa DVMF nga si Dr. Alice Utlang wala matuman sa maong mga ihawan ang location kay ang ilang ihawan naa ra sa balay, wala sab kini makapasa sa structural ug operational, floor dressing ug duol ra sa kabalayan nga wala makatuman sa zoning ug waste disposal.
Giklaro hinuon ni Dr. Utlang nga ang maong mga ihawan mahimo ra gihapon makaluto og lechon apan dili sila makaihaw sa ilang pasilidad.
“Ang ihawan naa man guy certain standard nga gi-require gyud sa National Meat Inspection Service (NMIS) pun-an pa sa bag-ong balaud kanang sa Food Safety Act. So, kinahanglan pud giunsa pag-prepare, asa dapit gi-prepare, kinahanglan mohaum gyud siya sa standard”, pasabot ni Dr. Utlang.
Gitataw usab niini nga ilang gipahimangnuan matag karon ug unya ang maong mga ihawan, mag-evaluate sila dayon ug duna sila’y ipatrabaho, apan niabot sa punto nga ang NMIS, dili na motugot nga ang mga ihawan dili motungtong sa A status.
Kini maoy rason nga gusto sa DVMF nga ang tanan gyud moabot sa double ug single A nga status.
Buot ni Utlang nga mosaka ang standard sa mga ihawan sa siyudad ilabi na nga gipasigarbo sa Sugbo ang lechon.
Nasayran nga kada tuig mohimo ang DVMF og evaluation sa mga slaughter houses sa siyudad apan karong tuiga niadtong Abril miuban sa DVMF ang NMIS aron walay pabor-pabor kay sigon ni Utlang sa balaud ang NMIS maoy mo-accredit sa mga pasilidad.
Kagahapon sa buntag nag deliberation ang DVMF ug didto nasuta nga adunay lima ka ihawan ang ipasira.
Ang dakbayan adunay 27 ka slaughter house. (/DILT)(BANAT NEWS)