CEBU, Philippines – Balik normal ang trabaho sa Talisay City Hall human nahibaw-an nga walay sulod nga bomba ang bag nga gikalisangan sa kadaghanan niadtong Miyerkules sa buntag.
Nahibaw-an nga ang tag-iya sa bag mao si Roberto Cabugnason nga taga Sitio Baybay, Barangay Dumlog, Siyudad sa Talisay.
Ang iyang bag nabantayan dapit sa buhatan sa City Social Welfare and Development (CSWD) nga gipasagdan lang.
Si Felipa Solana, pangulo sa CSWD, nagkanayon nga nagpakitabang gyud si Cabugnason sa ilang buhatan kay siya walay ikaplite sa barko nga mouli sa Bais City, Negros Oriental aron sa pagtambong sa pagbilar sa iyang igsuon nga namatay.
Asoy pa ni Solana nga makuha na unta ni Cabugnason ang iyang tiket sa barko apan gumikan sa bomb scare na delatar na hinoon kini.
Mapasalamaton lang gihapon si Solana nga walay dautan nga nahitabo human sila nalisang.
Ang Civil Security Unit (CSU) nipahugot na sa mga tawo nga mosulod ug gawas sa Talisay City Hall.
Gilauman sa katawhan nga adunay pagsusi sa mga bag ingon man pagrekisa sa mga tawo nga gustong mosulod sa edipisyo. (/GMR)(BANAT NEWS)