CEBU, Philippines — Dili pa tanang operators sa mga pangpublikong sakyanan sa Sugbo ang nakakuha sa taripa sa bag-ong minimum nga plitehan sa buhatan sa Land Transportation Franchising and Regulatory Board.
Kini ang gitug-an ni LTFRB-7 Regional Director Eduardo Montealto nga nahinabi sa Banat News.
Matud ni Montealto nga 70 porsyento pa lang ang nakakuha sa taripa hinungdan nga dili gyud mahimong makapaningil ug dugang plitehan kadtong wala pay mga taripa.
Sumala pa ni Montealto nga walay tulubagon ang wala nikuha sa taripa apan dili sila pwedeng magpatuman sa usbaw sa minimum nga plitehan.
Dugang ni Montealto nga walay tagal ang pagkuha sa taripa apan ang masakpan atol sa inspeksiyon makamulta og P5,000 kadtong walay gibutang o display nga taripa sulod sa PUJ.
Gibutyag ni Montealto nga ang dili mokuha nagpasabot lang nga dili sila magpataas og plitehan.
Awhag ni Montealto sa mga operator ug drayber nga aron dili mapuwerhisyo maayo nga mosunod sa lagda sa LTFRB. (BANAT NEWS)