CEBU, Philippines — Talandugon karon ang kahimtang sa usa ka polis human kini natagakan og patay nga kahoy nga anaa sa daplin sa kalsada samtang nagbiyahe kini paingon mo-duty sa Poro Police Station diin kini madestino.
Ang natagakan giila nga si Police Senior Sergeant Geophy Tampus ,35, nadestino sa operations department, ug residente sa Barangay Mabini, sa maong lungsod.
Sigun sa desk officer sa maong estasyonan nga si Police Corporal Bernard Entrolizo, nagmaneho sa iyang motorsiklo si Tampus niadtong Mayo 22 sa gabii paingon unta mo-duty.
Ug pagabot diha sa may Sitio Bogohay, Barangay Western Poblacion, kalit lang nga natumba ang usa ka patay nga kahoy daplin sa dalan ug adto natumba sa ulo sa maong polis.
Swerte lang sab nga adunay laing mga motorista nga nagsunod sa maong polis nga dali dayong nitabang kaniya ug nitawag og ambulansya.
Kasamtangang nagpaalim sa tambalanan ang biktima ug gikatakdang dalhon sa usa ka pribadong hospital sa Dakbayan sa Sugbo tungod sa grabeng kadaot nga naangkon sa iyang lawas ug ulo sa maong aksidente. (/IBM)(BANATNEWS)