CEBU, Philippines — Mipasaka sa iyang supplemental judicial affidavit si Cebu City Mayor Tomas Osmeña batok kang Patrolman Romil Gelogo human sa ilang binayloay og pagpasaka og kaso batok sa usa’g-usa.
Sa iyang affidavit, mipadayag si Osmeña nga kinahanglan imbestigahan sa Ombudsman si Gelogo tungod sa unexplained wealth, false testimony in other cases, perjury, ug paggamit niini og dili rehistradong motor.
Sa affidavit sa mayor, nangangkon si Gelogo nga nanag-iya siya og relo nga mobalor of P150 mil ug base sa iyang sweldo isip usa ka Patrolman kinahanglan siya nga maimbestigahan sa iyang unexplained wealth.
Sa reklamo ni Gelogo batok sa mayor nangangkon siya nga gikuha ni Osmeña ang iyang motor lakip na sa usa ka Tag Heuer nga relo nga matud pa niya hinatag sa iyang ig-agaw nga nagtrabaho gawas sa nasud.
Ang maong pagbinayloay og kaso namugna niadtong usa ka insidente diin usa ka trabahante sa City Hall ug lain duha ka opisyal sa Sangguniang Kabataan sa Barangay Cogon ang gidakop sa kapolisan sa pamasangil sa vote-buying bisperas sa adlaw sa piniliay.
Dihang miadto si Osmeña sa Cebu City Police Office, wa siya pasudla sa mga polis ug iyang nasugatan si Gelogo nga naka shorts, nag-tsinelas samtang luwan sa usa ka motorsiklo nga dili rehistrado.
Si Gelogo mipasaka sab og kaso nga usurpation of official function, violation of Anti-graft and Corrupt Practices Act, slander, grave coercion, direct assault, grave misconduct, violation of Anti-Carnapping Act, robbery, serious dishonesty, oppression, and conduct prejudicial to the best interest of the service.(/IBM)(BANATNEWS)