CEBU, Philippines — Si Police Regional Office-7 Director Brigadier General Debold Sinas mipasabot nga wala pay naabot nga order sa ilang buhatan kabahin sa mandato sa presidente nga librehon ang mga first time job seekers sa pagkuha og police clearance ug uban pang mga dokumento sa gobiyerno.
Dili palang dugay, gipirmahan ni Presidente Rodrigo Duterte ang Republic Act number 11261 o ang First Time Job Seekers Assistance Act niadtong Abril 10.
Ubos sa maong balaod, dili na pabayron sa mga dokumento gikan sa gobiyerno kadtong first time job seekers.
“As to the proclamation of the president wala pa, naghulat mi og guidance,” sigun sa maong heneral. Sa pagkakaron, giingong aduna pay bayad ang mga police clearance.
“Mas gwapo siguro na walay bayad para ma encourage mokuha aron makatrabaho, para sa ako ha I will support it, wala pa kay trabaho maggastos na ka og dako di ba?,”padayag sa maong heneral.
Hinuon, gianam-anam na og implementar sa kapolisan ang centralized police clearance system.
Butyag sa maong heneral, 15 ka mga estasyonan sa polis sa Central Visayas ang nabutangan niini.
Niini, giingong dali na lang sa pag-trace kadtong mga adunay pending nga warrant.
“Ang data base sa national, so if naa kay record i-serve sa imoha dayon,” sigun ni Sinas. (/IBM)(BANATNEWS)