CEBU, Philippines – Patay ang usa ka drayber sa habal-habal ug ang traffic enforcer nga giingong maoy namusil human kini napusilan sab sa nirespondeng polis nga naatol nagpatrolya diha sa Tamiya, Barangay Basak, Dakbayan sa Lapu-Lapu kagahapon sa buntag.
Ang traffic enforcer nga napatay sa polis sakop sa City Traffic Management Service (CTMS) sa maong dakbayan, giila nga si Rolando Lumongsod.
Base sa imbestigasyon sa kapolisan niabot si Lumongsod sa lugar sakay sa iyang motorsiklo ug mikanaog dayon giduol ang nagtalikod nga si Juney Sollano, taga Barangay Pajo, kinsa presidente sa Tamiya Riders Association sa mga habal-habal sa maong dapit.
Dihadiha gipusil ni Lumongsod si Sollano sa makadaghang higayon hangtud nga kini nahapla sa karsada. Dihadiha mibalik si Lumongsod sa iyang motorsiklo apan napusilan kini sa nirespondeng polis.
Nakuha ang maong krimen sa CCTV camera gikan sa pag-abot hangtud sa pagpusil ni Lumongsod kang Sollano hangtud nga kini sab napusilan sa mirespondeng polis nga si Police Corporal Jacinto Sagarino.
Si Sagarino maoy nadestino nga beat patrol sa maong dapit ug nakadungog sa butobuto dili layo sa iyang gikahimutangan maong dali kining niresponde ug nakita niini ang gunman ug kini iyang napusilan.
Matud pa sa iyang pangangkon, sa iyang tan-aw padung mobunot og armas ang suspetsado maong iya kining giunhan. Sa unang buto hagba dayon si Lumongsod.
Sa interview sa Balitang Bisdak, miingon si Sagarino nga miduol kaniya si Sollano tulo ka semana na ang nakalabay kay gihulga kini ni Lumongsod ug pirme siyang sunod-sunoron niini.
“Nakadungog ko og buto-buto, unya singgit. Mao ‘to nidagan dayon ko padung, niya kita man ko mobunot siya sa iyang pusil, ako dayon siya gipusil,” sigon pa ni Sagarino.
Si Police Colonel Lemuel Obon, director sa Lapu-Lapu City Police Office dali pud nga miresponde sa crime scene. Sa pakigninabi kaniya sa The Freeman/Banat News, iyang gidayeg ang reaksyon ni Sagarino sa sitwasyon.
“Ato ning tagaan og commendation ang atong pulis. Dahil dali ra siya na nakaresponde. It proves na epektibo ang atoang pagpatuman sa seguridad,” sigon pa ni Obon sa usa ka phone interview.
Plano karon ni Obon nga tigumon ang mga drayber sa habal-habal ug ang taga CTMS aron mahilot kun duna man silay gikabikilan.
Sumala pa ni Obon, bisan unsa pa kadaghan ang mga polis sa karsada kun desidido gyud ang mga kriminal mopatay dili nila kini siguradong mapugngan.(Romeo Limpangog/IBM)(BANAT NEWS)