CEBU, Philippines – Gumikan sa padayon nga pagnihit sa tubig ang mga barangay sa north district sa Dakbayan sa Sugbo gihangyo nga motabang sa mga barangay south district sa water rationing.
Si Konsehal Dave Tumulak, chairman sa committee on Public Order and Safety nibutyag nga kasagaran sa mga barangay sa south district nakasinati og water shortage.
Base sa listahan kagahapon sa Metropolitan Cebu Water District (MCWD) adunay 23 ka lugar nga apektado sa pagnihit sa suplay sa tubig.
Ang mga lugar gilangkuban sa Mambaling, Capitol Site, Punta Princesa, Tisa, Sambag 1, Sambag 2, Calamba, Basak Pardo, Banawa, V. Rama, Guadalupe, Labangon, Tres de Abril, B. Rodriguez, Basak San Nicolas, Duljo Fatima, Englis, Sawang Calero, Pasil, San Nicolas Proper, Ramos Street, D. Jakosalem Street, San Antonio ug Kamagayan.
Ang schedule sa distribution sa tubig ngadto sa mga apektadong dapit magsugod sa alas 9:00 sa buntag hangtud sa alas 3:00 sa hapon aron malikayan ang kahuot sa trapiko atol sa peak hours.
Gumikan sa huwaw ang MCWD dili na paigo ang suplay sa tubig alang sa 19,800 ka kabalayan tungod kay ang tinubdan sa tubig nikunhod ang production niini. Si Tumulak nagkanayon nga ang Barangay Basak Pardo ug Labangon ang nitabang sa kagamhanan sa Siyudad sa Sugbo sa water distribution. Nihangyo usab si Tumulak sa MCWD nga moabang og water tankers nga mo-augment sa existing fire trucks ug ubang ekipo alang sa distribution sa tubig.
Giawhag usab niya ang publiko nga magdaginot og tubig tungod kay dili matag-an kun hangtud kanus-a ang huwaw. (/BDB)(BANAT NEWS)