CEBU, Philippines — Naglaraw si Konsehal Gail Restauro sa Siyudad sa Talisay kinsa mao say tsirman sa committee on Peace and Order nga hatagan og allowance ang tanang mga polis nga nag-alagad sa dakbayan.
Ang maong laraw nahimo human iyang nakita nga dili lalim ang trabaho sa kapolisan ingon man daghan sab sila og mga personal nga panginahanglanon.
Matud ni Restauro nga ang ilang nahatagan og allowance matag buwan mao lang ang mga polis nga nadestino sa Brgy. Tanke diin mokantitad og usa ka libo ka pesos. Iyang gusto nga tanang polis sa Talisay mahatagan og allowance.
Ang mga polis sa Brgy. Tanke gibana-banang moabot sa kapin 40 samtang ang anaa sa Brgy. Poblacion anaa sa 60.
Apan si Restauro mitataw nga ang iyang plano ikunsolta una niya kini ngadto kang Mayor Eduardo Gullas ingon man tan-awon sab nila ang ilang pundo alang niini.
Dugang sa konsehal nga kon mga kagamitan ang hisgutan, daghan na ang nahatag sa kagamhanan sama sa motorsiklo, patrol car ug uban pa.
Hinuon aduna pay mga hangyo ang mga polis nga wala pa nila mahatag ug ila kining paningkamutan nga matuman. Taliwala niini, kontento si Restauro sa gipakitang serbisyo sa mga polis sa Dakbayan sa Talisay. (/DILT)(BANATNEWS)