CEBU, Philippines – Ang underpass project diha sa Natalio Bacalso Avenue nga gilaumang buksan sa mosunod nga buwan giingong 94 porsyento na kining nakompleto sa contractor niini nga WT Construction Inc.
Si Department of Public Works and Highways (DPWH)-7 project engineer Roy dela Cruz nibutyag nga ang contractor hapit na mahuman sa proyekto diin ang nahibiling trabaho mao na lang ang concreting sa pavement.
Gawas sa involved works sa four phases ang WTCI nakainstolar og upat ka submersible pumps nga maoy mo-pump out sa tubig atol sa ting-uwan.
Ang proyekto gilangkuban kini sa unom ka phases diin ang unang phase mao ang atubangan sa usa ka fast food chain ug ang ikaduha atubangan sa usa ka shopping center.
Nahimutang ang third phase sa corner F. Llamas Street, ang fourth phase mao ang northbound lane sa N. Bacalso Even, ang ikalima ug ikaunom mao ang tunga-tungang bahin sa proyekto.
Matud ni dela Cruz nga ang concreting sa pavement molanat og usa ka semana.
Ug kong mahuman na ang proyekto laing usa ka semana ang itagana sa contractor alang sa curing period.
Human sa maong period, ang WTCI motugot sa quality assurance unit (QAU) pagsusi kon ang proyekto dunay depekto o wala.
“By June, human na siya. But we will not open that immediately kaya atong ipa-check sa quality assurance unit namo, QAU, checks for defects, naay minor corrections maybe before mo-open”, matud ni Dela Cruz.
Sa dili pa ang official opening, ang DPWH makig-alayon sa Cebu City Transportation Office (CCTO) ug city officials alang sa posibleng bag-ong traffic scheme sa dapit.
Si dela Cruz nagkanayon nga ang underpass makatabang pagpaloag sa sitwasyon sa trapiko sa south district tungod kay ang mga sakyanan dili na magtapok main thoroughfare.
Sa iyang bahin, ang operations chief sa CCTO Francisco Ouano nagkanayon nga ang tanang Public Utility Jeepney (PUJ) maka-access sa northbound ug southbound side roads.
Apan mokonsulta pa siya sa mayor kon tugotan o dili ang mga bus, mini bus nga moagi sa underpass. (/BDB)(BANAT NEWS)