CEBU, Philippines — Giawhag sa kaparian ang katawhan sa ilang pagbotar karong adlawa ang pagpili og kandidato.
Ang maong pag-awhag gisukip sa wali sa ilang mga misa kagahapong sa adlawa uban ang pagpangayo og giya ngadto sa Ginoo.
Sa wali maoy ilang gipasabot nga ang pagpili og kandidato labing mahinungdanon ang pag-ila kanila ug nakaila usab sila sa katawhan nga nagpili kanila.
Pag-ampo ug pagpaminaw sa konsensya mao sab ang awhag sa pangulo sa Commission on the Laity nga si Fe Mantuhac-Barino. Kinahanglan tan-awon sa mga botonte ang kaayohan sa lawas ug kalag diin dili lang maayo modumala sa gobyerno apan hasta usab sa katawhan.
Angay usab tan-awon sa mga botante ang mga politiko nga andam morespeto sa dungog ug kabalaan sa kinabuhi sa tawo ug manalipod usab sa kaminyoon.
Gitug-an ni Barino, sagrado ang pagbotar busa dili angay ibaligya o modawat og kwarta bugti sa pagpili sa kandidato.
Awhag niya nga mas maayo nga mag-ampo sa dili pa mosuwat sa balota.
Labing maayo usab nga mag-andam daan og listahan sa mga kandidato nga botaran aron dali nga mahuman ug dili na mahasol sa pagpili og mga kandidato. (Romeo T. Limpangog/DILT)(BANATNEWS)