CEBU, Philippines – Temporaryong buksan sa mga pribadong sakyanan ang underpass diha sa Natalio Bacalso Avenue gikan sa Mayo 11 ngadto sa 12 sa tungang gabii ug sa Mayo 13 sa alas 12 gihapon sa tungang gabii aron makatabang sa kahuot sa trapiko sa South District panahon sa eleksiyon.
Sigon sa Operations Chief sa Cebu City Transportation Office (CCTO) Francisco Ouano ang tunnel maagian sa mga light vehicles sanglit ang WT Construction nga maoy kontraktor sa proyekto nakakompleto na sa road concreting sa center lane.
Nakadesisyon sila nga buksan ang underpass project sulod sa duha ka adlaw aron paghatag og alternatibong dalan sa mga pribadong sakyanan atol sa piniliay.
Sigon ni Ouano gilauman nila nga daghang sakyanan ang magdagan sa kadalanan sa siyudad sanglit ang publiko mobotar sa ilang tagsa-tagsa ka polling centers.
Niadtong adlaw’ng Huwebes ang CCTO uban sa Department of Public Works and Highways(DPWH)-7 ni-post sa traffic advisory labot niini aron pagpahibawo sa mga motorista.
Mopakatap og dugang unom ka traffic enforcers ang CCTO aron mobantay sa dagan sa trapiko sa South District.
Ang mga Public Utility Jeepneys (PUJs) adto moagi sa northbound ug southbound sideroads aron makapanaog ug maka-pick up sila og pasahero sa dalan.
“Atong tan-awon kung unsa ka volume ang sakyanan, ubos ug ilawom man gyud ta, gihimo na siya para agianan but then tungod sa kadaghan sa sakyanan diha sa south padong diri sa north isa gyud na sa makatabang," matud pa ni Ouano.
Mahimo sab makasud mga PUJs sa mga gagmay’ng diversion routes sama sa Ganciang St., Caimito St., F. Llamas St., Tagunol St. ug uban pa,samtang ang tanang bus, mini bus ug delivery trucks adto lang gihapon paagion sa Cebu South Coastal Road (CSCR).
Si DPWH-7 Project Engineer Roy dela Cruz miingon nga ilahang inisyatibo nga temporaryong buksan ang underpass project atol sa election period.
Matod ni dela Cruz ang kontraktor sa underpass 94 porsyento na nga nakakompleto sa proyekto ug ang nahibiling sayes porsyento gitagana alang sa concreting sa pavement ug curing period. —/LPM (BANAT NEWS)