CEBU, Philippines – Niawhag ang Comelec ngadto sa mga botante nga sa dili pa ang adlaw sa piniliay susihon na nilang daan ang mga lokal nga buhatan sa Comelec ug mangutana sa ilang polling precinct.
“We encourage the voters to visit their EOs to verify asa sila nga presinto aron dili sila mawala. It’s easy for them to go to precinct para dali na lang”, matud ni Atty. Jerome Brillantes, acting election supervisor sa Sugbo.
Matud ni Brillantes nga moabot ngadto sa 1,000 ang botante sa usa ka clustered precinct hinungdan nga angay nga masayod na silang daan ug labing maayo usab nga mosayo og botar aron dili magdasok.
Usa sa mga problema sa mga botante atol sa adlaw sa piniliay mao ang lokasiyon sa ilang presinto ug gani adunay uban tungod kay wala nasayod sa ilang presinto, dili modayon og botar.
Sa laing bahin, nangabot na ang mga kagamitan alang sa election sa Lungsod sa San Fernando ug andam na kini alang sa umaabot nga eleksiyon, kini ang gitug-an sa election officer sa lungsod Mario Orville.
Matud ni Orville nga preparado na sila alang sa eleksiyon diin nangabot na ang mga kagamitan ug anaa na kini sa municipal treasurer’s office sama sa mga balota ug uban pa. Humana usab sila sa refresher sa mga magtutudlo nga mo-serve sa eleksiyon. (Rowena D. Capistrano/BDB)(BANAT NEWS)