CEBU, Philippines – Higpit nga gipahimangnuan sa Commission on Elections (Comelec) ang 1,425 ka mga magtutudlo sa publikong tunghaan sa Dakbayan sa Mandaue sa ilang mga kaakohan sa adlaw sa Mayo 13 elections.
Sa gipahigayong briefing sa Comelec ngadto sa mga magtutudlo labot sa mga guidelines, nalakip niini mao ang pahimangno nga pabiling neutral ug kini mapakita pinaagi sa pagsul-ob og white collared t-shirt.
Ang tulo ka adlaw nila nga seminar nga nagsugod niadtong Abril 29, matapos karong adlawa, Mayo 3 sanglit gilat-angan man ang Mayo 1 nga holiday.
Pahimangno usab sa kadagkuan sa Department of Education (DepEd) nga higpit usab nga gidili nga magsul-ob og tsenilas atol sa ilang pagserbisyo sa piniliay.
Sa maong briefing, ang mga magtutudlo subling gipahinumdoman labot sa pag-operate sa voter registration verification machine o VRVM.
Sa nasayran, ang Sugbo maoy usa sa pito ka mga probinsiya nga nalakip isip pilot area alang sa pag- operate sa mga VRVMs.
Ang Dakbayan sa Mandaue adunay 244 ka mga VRVM basi usab sa gidaghanon sa gi-clustered precincts.
Awhag usab sa Comelec mao ang pagsusi sa Election Day Voters List (EDVL) alang sa pagsuta sa gidaghanon sa narehistro nga mga botante.
Si Mandaue City assistant election officer Jacqueline Reuyan miingon nga daghang narehistro sa ilang buhatan ang ilang gitangtang dihang ilang nasuta nga namalhin na kini sa pagparehistro ngadto sa laing mga lugar.
Dugang pahimangno sa taga Comelec ngadto sa mga magtutudlo nga kinahanglan siguroon usab nila ang ilang kapiskay sa panglawas sa adlaw sa piniliay. (/DILT)(BANAT NEWS)