CEBU, Philippines — Si Konsehal Dave Tumulak, ang deputy Mayor for Police Matters ug tsirman sa Committee on Public Order and Safety miasoy nga uyon siya nga adunay checkpoint ilabi na sa mga crime prone areas.
Si Tumulak mitataw nga bisan uyon siya sa checkpoints, dili kini angay himuon sa mga dapit nga walay mga insidente ug dead end nga agianan.
Mas maayo nga adto kini himuon sa mga lugar nga daghang tawo aron sab mabantayan ang katawhan.
Kahinumduman nga nakontrobersiyal ang pagpahigayon og checkpoint sa kapolisan sa Siyudad sa Sugbo sa atubangan sa balay sa mga barangay kapitan ingon man sa balay mismo ni Mayor Tomas Osmeña.
Gani migawas ang report nga matud pa ipa-recall ni Police Regional Office (PRO)-7 Director Brigadier General Debold Sinas kadtong mga polis samtang nag-checkpoint duol sa balay ni Mayor Osmeña nga midawat sa gihatag nga sandwich ni Konsehal Margarita Osmeña.
Si Konsehal Tumulak mihangyo kang Sinas nga dili silotan ang mga polis sanglit ang paghatag og sandwich nila wala nagpasabot nga suborno kadto.
“For me that’s a humanitarian reason nga ako gani personally og naa gani koy makit-an mag-checkpoint mohunong gani ko kay ako silang palitan, ang atong mga kapulisan not in the sense nga atong gisubornohan but pasalamat ngadto nila, niya personal man na, mohangyo lang ni General Sinas kung mahimo ayaw lang, ayaw lang silota atong mga pulis kay kana personal man na nga hatag sa atong mga tawo especially kang Councilor Margot nga naluoy siya sa mga police, mas maayo man na to strengthen the camaraderie, the relationship between the police and the community”, dugang sa Konsehal. DILT (BANAT NEWS)