CEBU, Philippines — Gilauman nga mosaka og 10 porsyento ang gidaghanon sa mga pasahero nga modagsa diha sa Cebu South Bus Terminal atol sa Semana Santa kon itandi sa niaging tuig.
Si Jonathan “Joy” Tumulak, operations manager sa terminal nagkanayon nga sa niaging tuig niabot sa 237,840 ang mga pasahero nga nibiya sa terminal o ang departure samtang 173,940 usab ang arrival.
Sa kinatibuk-an niabot sa 411, 780 ang mga pasahero diha sa terminal sa Semana Santa niadtong tuig 2018.
Ug sa karon gibanabana nga moabot ngadto sa 450 mil ka tawo ang modagsa diha sa terminal sa Semana Santa.
Si Tumulak nagkanayon nga gipaabot nila nga sa Miyerkules Santo ang labing daghan nga pasahero nga modagsa diha sa CSBT.
Karong Abril 15, sugdan ang pagpatabang sa 50 ka kawani sa Kapitolyo nga moapil sa mga personnel sa CSBT sa pag-assist sa mga pasahero.
Matud ni Tumulak nga ni-request na sila og unom ka portalet sa lokal nga kagamhanan sa Dakbayan sa Sugbo ug railings gikan sa traffic office.
Gibutyag ni Tumulak nga walay empleyado sa CSBT nga tugotang maka-leave sa maong higayon.
Ni-request usab sila og dugang PNP personnel sa Cebu Provincial Police Office ug Cebu City Police Office nga motabang sa seguridad sa terminal ug mga pasahero. (/BDB)(BANATNEWS)