CEBU, Philippines — Ang pagpahigayon sa pito ka pulong sa wala pa mamatay si Hesus diha sa krus gipangandaman na sa mga kadagkuan sa Cebu Metropolitan Cathedral.
Kini ang gitug-an ni Monsignor Ruben Labajo, moderator Team of Pastors sa Cebu Metropolitan Cathedral.
Matud ni Labajo nga moabot na ngadto sa usa ka buwan ang ilang mga panagtapok-tapok alang sa mga meeting sa paghisgot-hisgot ug pamalandong sa Siete Palabras nga pagabatbaton atol sa Biyernes Santo nga magsugod sa alas 12:00 sa udto.
Gibutyag ni Labajo nga lima ka layko ug tulo ka pari lakip niini ang mohimo sa introduction ug si Archbishop Jose Palma ang mopaambit atol sa “seven last words” diin nakasentro sila karon sa tema subay sa year of the youth.
Matud usab ni Labajo nga pipila sa mga mamumulong karon mahimo kini silang modelo sa mga batan-on ug naglihok usab alang sa mga kabatan-onan hinungdan nga iyang giawhag ang katawhan lakip usab ang mga kabatan-onan sa pagpaminaw sa umaabot nga pagpamulong sa mga mopaambit karong tuiga.
Tinguha karon sa mga mopaambit sa seven last words ang pagdasig sa mga kabatan-onan labi na kadtong mga nahisalaag sa dalan tungod kay dili lang sila ang ugma sa simbahan apan sila mismo ang simbahan. (/BDB)(BANATNEWS)