CEBU, Philippines – Moabot ngadto sa 151 ka mga ballot boxes ang panglimpyohan aron maoy gamiton sa piniliay karong Mayo 13.
Si Emma Macuto, ang treasurer sa Dakbayan sa Talisay nagkanayon nga ang maong mga ballot boxes gigamit sa miaging piniliay.
Ang mga sulod niini nga mga balota ila unyang tapukon sa usa ka luna ug gihulagway sa tresurera nga wala na kini bili kay wala may nahitabo nga election protest sa miaging piniliay.
Si Macuto mitataw nga human nga ilang nadawat ang suwat gikan sa Commission on Elections labot sa maong mando, dali siya nga mipadala og suwat sa mga kandidato nga magpadala og representanti aron mosaksi sa himuong pagpanglimpyo.
Sugod sa alas 9 sa buntag karong adlawa, han-ayon na nila ang mga ballot boxes sa atubangan sa city hall bisan paman og aduna o walay representanti gikan sa mga kandidato.
Dugang ni Macuto nga diha ra ibutang ang mga ballot boxes hangtud nga kini dad-on sa mga clustered precinct sa tibuok siyudad.
Dugang pa niya nga butangan nila og tent ang lugar sa ballot boxes ingon man kural aron walay makahilabot.
Atol sa ilang paglimpyo, lakip na niini ang pagsusi kon aduna bay guba nga ballot boxes aron makahangyo sila sa Comelec nga pang-ilisan ang guba. (/DILT)(BANAT NEWS)