CEBU, Philippines — Pagpanglimpyo sa mga sapa sa Dakbayan sa Talisay nasugdan na, apan wala pay kasigurohan kun mapadayon kini aron masigurong dunay maayong resulta ang maong kalihokan human nga wala pay buhatan nga makapadayon niini ang siyudad. Ang pangu sa Talisay City Planning Development Council nga si Engr. Christine Homez nanghinaut nga adunay departamento sa siyudad nga maglihok pagpadayon niining pagpalimpyo.
Ang sapa sa Barangay Bulacao maoy usa sa gihulagway nga kritikal gumikan sa kahugaw na niini.
Si Homez niingon nga sila igo lang sa pagsugod o paghimo sa plano apan wa gyuy departamento nga nakatutok sa maong programa. Nahibaw-an nga ang maong trabaho iya unta sa City Environment and Natural Resources Officer (CENRO).
Apan hangtud karon walay CENRO officer ang Talisay. Hinuon naay staff ang maong buhatan nga naglihok sa inadlaw-adlaw nga trabaho.
Gidungog kaniadto nga kanhi konsehal sa dakbayan ang itudlong mangulo sa maong posisyon apan wa kini mahinayon. (/IBM)(BANATNEWS)