CEBU, Philippines — Ang Cebu City Bids and Awards Committee (BAC) mi-schedule sa public bidding alang sa pagpalit sa 21 ka compactor trucks nga nagkantidad og P232 million ugmang adlawa, Martes.
Matud sa pangulo sa BAC nga si Ronaldo Malacora, ilang giusab ang adlaw sa maong bidding gikan sa March 12 ngadto sa March 26 subay na sa sugyot ni Mayor Tomas Osmena nga ilisdan ang specs sa maong heavy equipment.
Mao na kini ang ikaduhang higayon nga mohimo og public bidding ang kagamhanan sa siyudad subay sa pagpalit og bag-ong ekipo alang sa paglabay og basura.
Matud ni Malacora nga ang tanang moapil nga suppliers kinahanglang mohatag sa bidding documents alang sa pagsusi niini sa Technical Working Group ugma.
Unang buksan sa TWG ang dokumento sa supplier nga nagtanyag og labing ubos nga presyo. Apan gihimug-atan ni Malacora nga ang lowest bidder dili maoy basihan sa deklarasyon sa winning supplier.
Karong tuiga ang Department of Public Services mipili nga mopalit og bag-ong trak aron makamenus sa gasto sa pagpanghakot og basura. (/DILT)(BANATNEWS)