CEBU, Philippines — Hilom apan nikisaw na gyud ang politika sa Dakbayan sa Talisay human naobserbaran nga buntag ug gabii, magpahigayon og ginagmay nga pulong-pulong ang mga politiko.
Ang grupong Alayon mao ang midominar nga gipangulohan ni kongresista Gerald Anthony “Samsam” Gullas nga magpapili pagka mayor gumikan sa ilang lig-on nga grupo.
Kaatbang ni Samsam ang kanhi mayor nga si Johnny V. de Los Reyes nga walay ka-tandem nga bise mayor apan adunay pipila ka mga ka-line-up nga magpapili pagka konsehal.
Ang kandidato nga pagka bise mayor sa Alayon nga si Alan Bucao, atbangan sab ni kanhi bise mayor Romeo Villarante nga wala sab nagdala og mayor apan adunay tulo ka mga konsehales nga kauban.
Nunot niini, mitumaw ang istorya nga vote straight gyud ang gusto sa Alayon.
Gani kasaligang tinubdan misaysay nga sila gihugtan aron ilang botaran ang tanang kandidato sa Alayon. Apan sila mitubag nga wala silay problema sa ubang mga kandidato apan adunay pipila nga dili gyud nila madala.
Sila nanghinaut nga unta dili nalang sila pugson sa ilang botaran kay mayoriya man gyud ang ilang botaran sa Alayon.
Tinubdan nga taga Brgy. Mohon mitataw nga Gullas-Villarante man tuod ang migawas nga mananaug sa survey, apan kon kwarta na ang molihok walay kasigurohan nga kini matuman.
Samtang si Konsehal Doroteo Emit nga gikan sa Alayon kaniadto miingon nga wala na siya’y mahimo kon mao gyud ang gusto sa kanhi niyang mga kaubanan.
Apan iyang giklaro nga ang ilang lider mao rasab ang lider niya kaniadto.
Lahi sab ang panahom ni kanhi konsehal Dennis Basillote kay ang kaagi sa Talisay wala pa gyud maka-vote straight. Iyang gihangyo ang katawhan nga unta magmata na ug makamao na unta nga mopili og kandidato nga mangulo sa dakbayan. (/DILT)(BANATNEWS)