CEBU, Philippines – Nikabat sa kapin sa P1 milyon ang gitanyag nga pabuya alang ni bisan kinsa nga makatudlo o makahatag og kasayoran sa tulo ka kriminal kinsa nipatay ug nipanit sa nawong sa 16-anyos nga estudyante sa grade 9 ug kolektora sa simbahan nga si Christine Lee Silawan.
Ang Police Regional Advisory Council-7 una na nga nitanyag og P100 mil nga pabuya.
Samtang si Lapu-Lapu City Mayor Paz Radaza nipahibawo nga laing P1 milyon nga pabuya ang ihatag sa kagamhanan sa dakbayan.
Ug giingong adunay retirado nga sundalo nga Amerincan national ang nitanyag nga mohatag og P500 mil nga pabuya. Senior Superintendent Limuel Obon, direktor sa Lapu-Lapu City Police Office (LLCPO) niklaro nga wala pa’y langyaw nga retiradong sundawo nga miduol o nanawag sa ilang buhatan aron ipahibalo nga modonar og P500 mil nga madugang sa pabuya sukwahi kini sa mga nanggawas nga report.
Si Obon nipasalig nga bisan pa og wala ang maong pabuya himuon nila ang ilang trabaho ug palawman nila ang ilang imbestigasyon.
Nunot niini, ang Provincial Council for the Welfare of Children (PCWC) mohatag usab og P200 mil nga pabuya ngadto sa mga makatudlo sa mga kriminal.
Si Bise Gobernador Agnes Magpale, pangulo sa PCWC nibutyag nga mo-sponsor siya og resolusyon alang sa maong pabuya nga ihatag gikan sa ilang buhatan.
Matud ni Magpale andam usab sila makig-alayon sa lokal nga kagamhanan sa Dakbayan sa Lapu-Lapu alang sa pagsulbad sa kaso sa pagpataya kang Silawan.
Samtang si Gobernador Hilario Davide, III nagkanayon angay nga madakop ug mapriso ang mga kriminal aron mahatagan og hustisya ang linuog nga pagpatay sa dalagita.
Ipasusi usab ni Davide ngadto sa kapolisan kon aduna bay koneksiyon ang nahitabo kang Silawan ug sa mag-uuma sa Dakbayan sa Danao nga gipatay ug gipanitan usab ang nawong.
Subay niini, ang kapolisan nibutyag nga gisusi na nila ang pagbinaloay og kumunikasyon sa biktima ug sa ilang gikatahapan nga prime suspect.
Matud ni Obon nga giingong si Silawan adunay gikabayloay og mensahe apan wala pa niya ibutyag ang pangalan sa gikabayloay og mensahe sa biktima. (Camille L. Pateres ug Le Phyllis F. Antojado/BDB)(BANAT NEWS)