CEBU, Philippines – Patay na nga nagkumbitay ang usa ka lalaki dihang nakaplagan siya sa iyang pinuy-anan diha sa Siti Tunga sa Barangay Tanke, siyudad sa Talisay kagahapon sa kadlawon.
Ang namatay ug gituohang gahikog mao si Benjie Dabasol, 43-anyos.
Si Chief Insp. Ardeolito Cabagnot, deputy chief sa Talisay City Police Station nagkanayon nga nag- away ang namatay ug ang iyang kapuyo nga si Celeste Obrero tungod sa pagduda nga aduna’y gikalingawan nga laing lalaki ang iyang hinigugma.
Ang namatay miinom og ilimnong makahubog hangtud nga ang iyang asawa natulog.
Si Obrero nakamata sa dihang gibuboan og haplas ang iyang mata sa iyang kapuyo. Sa pagbukas sa mga mata ni Obrero iyang nakita ang iyang hinigugma nga naghigot sa iyang liog nga nagbitay sa iyang atubangan.
Dali nga nitawag og pakitabang si Obrero apan wala na gyud kini nasalbar.
Asoy pa ni Cabagnot nga problema sa pamilya ang hinungdan sa iyang pagkutlo sa iyang kaugalingong kinabuhi.
Siya niingon nga gihulga lang ang namatay nga siya ilisan tungod sa iyang pagkamadudahon. —/LPM (BANAT NEWS)